نعم سبحـــــانه الخـــــالق رسم هالكـــون في خــدّك
عطاك من الحســن كلّه ومـــا في العــــالم اثـنينـــك

تغلّي والعبي بقلـــبي وقلــب النـــاس .. من قـــدّك ؟
مــــدام إن الحـــــلا كلـّـــــه لفــــاك وقبـّــل يْدينـــك

خذيــتي الحســـــن من يدّه وطاع وبعدهــــا شــــدّك
وبعده شـــــــاف للأرض اليـبــاس وحط نسرينــــك

تعرْفي الأرض لي داست عليهـــا الخـطــوه تـْـودّك
تعرْفي الريح لو يغضب .. سكن لو شاف في عينـك

واذا ما يديك لمْســــت ميـــتٍ في القبـــر ما هــــدّك
يجوز أستغفـــر الله لا  أبـــالغ  قــــال لك : وينــــك

ولو إن البحـــــر يحــــــــظى بطلـّه بس من قــــدّك
يصيــــر البحــر وامواجـــه وأسمــــاكه مجانينــــك

جميله بكل حـالاتــك .. رقيــقه بوصــــلك وصـــدّك
وانـــا ادري مــا أمــــر إلا على قلبــــك وتخمينـــك

أحبّــك كثــر ما عدّوا سنيـــــن العمــــر في عــــدّك
كبــرتي وشبــت يا بلـــواي يوم انتي في عشرينـــك

تمــرّي ما عرفـــــتي انـّـك خذيـــتي قلـــبي بيـَـــدّك
تطوفي شـــارعي ويبقى حديــث العطـــر بعدينـــك

تبين الوصف ما أقــدر .. دخيــلك وقــّـفي .. حــدّك
أخـــاف ان شفت عنـّــابك أذوب بجمــرك وبينــــك

أنــــا اصـــلاً مت يوم اني لمحـــت الورده بخــــدّك
تبيني بعدهــا أوصف بقايـــا حسنـــك وزينـــك ؟!!!

 

 

 

 

محمد عبد الله البريكي

قبل أوعّـي الشمس جيتي سوسنه تلثم سحابه

تنسكب فوق الزمرّد والـمسـا شك الخلايــا

صحّت أسراب الحناجـر وانتبه ديك الكتــابه
 يفرك عيون المرايا والوهـج صحّى الزوايـا

طفلة الريح المشـاغب زاحـمت صف الكآبـه
تطعن خيول الظلام وتســرق النجمه مرايــا

تنطلق مثل الفراشه في ميـادين الـخطابــه
 شارده من بعض كلّي ماخـذه كلّي حكايــا

زفّت العرس بيديـني شاعـر وبـن وربابــه
وخيمة الشيخ وضيوفه .. بندق وسيف وعبايا

 

تلعب النرد بخيـالي وأرتبك من هالدعــابـه
 وأنسحب منهـا إليها لين ترميني ضحـايــا

 

إيه أنا الغربه ثيـابي والألم بـخّر ثيــابــه
والفرح سرب يْتطايـر والأمل صقر ومطـايـا

 

تلتقي فيني مداين تنولـد غابـه وغــابــه
تسأل الظل بعباتي عن قنــاديـل الـهدايــا

 

عن دفا بيت القصيده عن شفـا الجرح وعذابه
عن حزن هذي الشوارع عن مواعيد وصبايـا

 

يا بعد كل الأحبـه يا بعــد كـل القـرابــه
شابت فصول السوالـف وانحنى ظلي ودفايـا

 

في يدك بيت القصيده ..رجّعي صوته وشبـابه
وان سأل عن كل عمره قولي ياعمري معـايـا

 

 

 

 

محمد عبد الله البريكي،،،

حزينه المملكه لا.. لا .. حزين الكون قبل العين

دموع اتلبّست زايد صبح فقـدك عليهـا  ثيـاب

فهد يا ابن الملك عبدالعزيز اللي خذاك  البيـن

ولا خلى قبل موتـك رجـال وأنبيـا واصحـاب

كسرنا الموت قلنا لـه : إذا ماجيتنـا  ميتيـن

واذا مرّيت أرض اتطيح هامـات ودُوَل وارقـاب

فهد كن السما كلها عيـون ٍ والبحـر بحريـن

وناداها العطش وتفجرت تحـت الحجـاج تـراب

بكاك البيت والمسعى ومن طافوا هنـا  ملبّيـن

وزمزم والحجر الاسود ومكه وركنها  المنصـاب

ويثرب والحرم فيها يصلّـي والبقيـع  الحيـن

تعزّي كل خفـاق ٍ علـى خطـوة رحيلـك  ذاب

فهد قالوا أديم الأرض مـن أجسـاد هالميتيـن

وكل حيٍّ على الدنيا حجز كرت ووقف ع  البـاب

أمانينا بهالدنيـا غصـون اتمرّغـت  بالطيـن

تصير ايامنـا الفـاس ومنيّتنـا لهـا  الحطـاب

ولو ان الحياه تفنى بموت اللي سبـق .. فانيـن

ولكن حكمـة الواحـد يسلّـم بعضنـا الجلبـاب

فهد .. ما مات من خلّف رجال ٍ ع العهد ماشين

رحلت وصار عبـدالله يكمّـل سيـرة  الاحبـاب

حزينه المملكه لكن عزانا انك خدمـت  الديـن

مثل زايد ابـن سلطـان تبقـى للنظـر أهـداب

حزينه المملكه لكن عزانا انـك بوسـط العيـن

على الله ما يجـي حرفـي علـى ضلـعٍ يهـد السـور

أبجـمـع كـــل أحـجــاره وألـــم الـطـيـن بـأزيـائـي

 

 

أبيـه إن لامـس إحساسـي يقـوم وينفـعـل ويـثـور

علـى خيـر النقـا .. يطـلـق خيـالـي بـيـن أنـوائـي

 

 

يسافر للمـدى .. ينسـى الزمـان ويرجـم المغـرور

يــقــول الله يــــا ورده .. تــقــدّر كـــــل آلائـــــي

 

 

وأنـا بيـن الـورق أجمـع فتـات اللـي بقـى بالـدور

وأطوف الأرصفه الغبرا على الباقـي مـن أشلائـي

 

 

أفـتّـش فــي سجـلاتـي وأزاحــم طفـلـة الـديـجـور

على شمـع الزمـان المنطفـي فـي معطـف أعبائـي

 

 

توكّيـت بعصـا حلمـي وشلـت سراجـي المكـسـور

عين الشمس .. وأحضان المطر والليل وأخطائي

 

 

يحاصرني البحر .. يلعب على موج المسا والنور

أشـوّر هالخشـب وأبحـث عـن الأبـراج بأعضائـي

 

 

سـألـت الـحـارس المـيّـت عـلـى بـوابـة النـاطـور

عـن اللـي شالـت الطفـل الوليـد وبـاقـي أسمـائـي

 

 

سألت وصارت ظروفي القديمـه ..قطعـة الديكـور

وبـاقـي هالستـايـر والـغـرف والــورد بأحـشـائـي

 

 

وجريـان الفـلـج فــي قريـتـي وغنـايـة العصـفـور

وقطـعـه مــن ســوارٍ جابـهـا لــي حـاتـم الطـائـي

 

 

سألـتـك ويــن هالغيـبـه ثـمـان اشـتـاقـت الـبـلّـور

عجـاف وهالسفـر أكبـر مـن إنّـه يجـمـع أشيـائـي

 

 

سألتك عن بعض بعضي ..بداياتي..عريش الزور

مراجيح الزمان. الطين . حلمـي . عالمـي النائـي

 

 

صحيح إن الزمن وقّف عقارب ساعة الساطـور ؟

صحيـح إن الحظـوظ المايـلـه تشـتـاق أجـوائـي ؟

 

 

صحيح إن الرحـى عافـت غـلال الحنطـه المنثـور

وبيـدار النخـل شخّـص أسـاس المشكلـه بدائـي ؟

 

 

ذكرتك .. آه ماقلت المطر يـروي الأراضـي البـور

ولا قـلـت الـزهـر ينـبـت لخـاطـر عـيــن أهـوائــي

 

 

لغيتـي الذاكـره منّي..لغيتـي الــدرس والطبـشـور

وجيت وقلت( سبحان الـذي أسـرى )بـك إسرائـي

 

 

تجيـن بغصـن زيـتـون وحـمـامٍ أبـيـضٍ مسـحـور

تشكّـيـن النـهـار بياسمـيـن الـجــرح فـــي لائـــي

 

 

أنا إن قلـت لـك أخشـى الشهـاب المنفلت..معـذور

أبــي أرضـيّـة الحـلـم الأخـيـر الـرافـض إجـلائــي

 

 

أبـي لاجـا البشيـر يكحّـل عيونـي عـن المحـظـور

يسلّمْـنـي مفاتـيـح الـفـصـول ويـخـطـب إغـرائــي

 

 

وأنـا الواقـف علـى بـاب النهـار بدولـة المنصـور

أبـي بعـض الخـراج اللـي يسـد الـجـوع بأزيـائـي

 

 

 

محمد عبد الله البريكي،،،

انضم الشاعر والإعلامي الإماراتي القدير محمد البريكي

 إلى طاقم قناة نجوم القصيد (NJOOM4)

التابع لمجموعة قنوات النجوم لصاحبها سهيل العبدول

 

وتعد هذه الخطوة هي الأولى من نوعها

 للشاعر محمد البريكي من خلال الإعلام المرئي

 بعد تجربته في الإعلام المقروء

 

وسيقوم الشاعر بالإعداد والتقديم والإشراف

على مجموعة من البرامج الشعرية التي ستنتجها القناة

 في الفترة القادمة

 

والجدير بالذكر بأن المختارات الشعرية

 التي تبث عبر القناة لكبار الشعراء في الخليج العربي

 تُلقى بصوت الشاعر محمد البريكي نفسه

 والذي يقوم بتسجيل قصائده الخاصة للقناة

@ بكالوريوس إعلام من جامعة عين شمس،، في جمهورية مصر العربية.

 

@ عمل صحافياً في عدة مطبوعات خليجية،، وأهم محطاته الصحافية:-

 

- جريدة الاتحاد "شعر وفن".

 

- جريدة الفجر "فجر الشعراء".

 

- مجلة الصدى "ملف جواهر" سابقاً.

 

- عمل مراسلاً لمطبوعة شعرية كويتية،، وتحرير بعض المطبوعات الخليجية.

 

- عمل سكرتيراً ومديراً للتحرير لمجلة "وجود" الإماراتية.

 

@ له ديواني شعر:-

 

1.همس الخلود.

 

2.سكون العاصفة.

 

@ أحيا العديد من الأمسيات الشعرية داخل الدولة وخارجها،، وأهم تلك الأمسيات:-

 

-أمسية في جامعة اليرموك (الأردن).

 

-أمسيتين في مدينة عمّان العاصمة الأردنية.

 

-المشاركة في مهرجان "المربد" كشاعر فصيح (العراق).

 

@ حكّم الكثير من المسابقات الشعرية،، مثل:-

 

- مسابقة مشتركة بين جامعة الإمارات وجامعة السلطان قابوس.

 

- مهرجان الشارقة الشعري الأول لمجلس طلاب كليات التقنية (رئيساً للجنة التحكيم)

 

- مهرجان الشعر العماني الأول والرابع (عضو لجنة التحكيم).

 

@ له العديد من القصائد واللقاءات والمقالات في عدد من المطبوعات المحلية والخليجية،، وعلى شبكات الانترنت في عدد من المنتديات والمواقع المعنية بالأدب.

 

@ استُضيف وشارك في عدد من البرامج التلفزيونية والإذاعية داخل وخارج الدولة.

 

@ فاز بالمركز الأول في مسابقة سمو الشيخ سعيد بن زايد آل نهيان للشعر الرياضي بمناسبة فوز نادي الوحدة الإماراتي بلقب الدوري لموسم 2004-2005م.

 

@ معد ومشرف البرامج الشعرية في قناة "نجوم القصيد"،، كما يستعد لتقديم بعض البرامج الشعرية للقناة ذاتها.

 

عساك بخير يا مضفي على صمتي حلاة التـوت

وش آخـــــر قصة الحِــــنا على آخر مكاتيــــبك

 

بعد لازال حرف اسمي على كفك حديث بيــوت

أو ان الســــاقيه صــــامت عن جملة أساليــــبك

 

سمعت بواحدٍ يعشــــق عـــذابه لين حدّ المـــوت

أنــا ذاك الذي لو غبـــت يعشـــق فيك تعذيــــبك

 

تطرش لي من الفرقـا كفـــن أسود مع التـــابوت

واطرش قــلب لفـّيـــته بياض ٍ جــا يصــــلي بك

 

أنا ادري فيك لو يوصل جنوني لين حدّ الصـوت

مع اول حرف من صوتي يهزك حيل ويجيـــبك

 

نعم مغرور سميــها غرور وشيـــطنة مبخـــوت

أشوفـك في يدي تسكن مثل ما تشوفــني فجيــبك

 

تـنـاسى بس لا تـنـــسى شبابيــــكٍ عليها تفـــوت

ولا تـنسى بعد عيـــبك تراه الحـــلم هو عيــــبك

 

كفاك ترتـــب الكلمه وتعزفــــها قصيده ونـــوت

إذا ما جيت من طيـبي تجي مشتــاق من طيــبك

 

حبيــبي حبنا ما ينطبـــق ضــده يفــوت الفـــوت

مدامك شــارب عروقي وانــا أشرب تراحيـــبك

 

تطمـن حبنــا آخــر حـــلاوه والشـــكوك سكوت

تطمن حبنــا عشــره على عشـــره في ترتيـــبك

 

سمعــت بقصة الحِنـــا وانا أذكر حــلاة التـــوت

في لحظتهـا رسمت اسمي على آخــر مكاتيـــبك

 

 

محمد عبد الله البريكي،،،